Patay ang isang grade 12 student matapos itong masangkot sa salpukan ng dalawang motorsiklo nitong gabi ng Lunes sa P. Condes St., Poblacion, Santa Fe, Romblon.
Kinilala ng Santa Fe Municipal Police Station ang biktima na si Elvin Jimenez, 17-taong gulang, grade 12 student at residente ng parehong barangay.
Batay sa imbestigasyon ng pulisya, patungo ang rider na si Jersam Samillano sa Poblacion nang masalpok nito ang motorsiklong minamaneho naman ni Jiminez pagdating sa P. Condes St.
Tumilapon ang mga sakay ng motorsiklo at nagtamo ng sugat sa iba't ibang bahagi ng katawan, dahilan upang isugod sa Don Modesto Formilleza Sr. Memorial Hospital sa Looc, Romblon. Inirekomendang ilipat ng Romblon Provincial Hospital si Jimenez matapos magtamo ng head injury ngunit namatay rin ito kinalaunan.
Matapos magamot, ikinulong sa Santa Fe Municipal Police Station ang rider na na nakasalpok kay Jimenez na si Samillano.
Posible siyang maharap sa kasong Reckless Imprudence Resulting to Homicide and Damage to Property.
