Nagsimula ng maglinis ng mga nakaharang sa gilid ng kalsada ang pamunuan ng Local Government Unit ng Odiongan kasunod ng order na pinalabas ni Local Government Secretary Eduardo Año na nagbibigay ng 60 days na palugit sa mga LGU na linisin ang mga public roads mula sa obstruction.
Unang nilinis nitong Huwebes ng grupo na binubuo ng Odiongan Municipal Police Station at Odiongan Transport and Regulatory Unit (OTRU) sa patnubay ni Vice Mayor Diven Dimaala, ang kahabaan ng J.P. Laurel Street mula Children Park and Paradise patungong Odiongan Public Market.
Sa panayam ng Romblon News Network kay Vice Mayor Dimaala, sinabi nitong ang kanilang ginagawa ay utos ng Department of Interior and Local Government at ni Pangulong Rodrigo Duterte kaya dapat umano itong sundin.
Binanggit rin nito na meron na umanong ordinansa ang bayan ng Odiongan na nagbabawal sa mga obstruction sa kalsada kaya ang mga hindi susunod sa kanilang clearing operation ay mananagot sa batas.
“Araw-araw kaming magsasagawa ng inspection sa mga kalsada, dapat sumunod nalang sila kung hindi bibigyan namin sila ng ticket, at pagmumultahin,” pahayag ni Dimaala.
Matatandaang inutusan ni Pangulong Duterte sa kanyang 2019 State of the Nation Address ang Metropolitan Manila Development Authority at si Secretary Año na i-reclaim ang lahat ng public roads sa buong bansa.
“I reiterate my directive, my request, my pleadings to the MMDA and all concerned local officials in Metro Manila, and all other cities, to undertake immediate action to ensure the speedy and smooth flow of vehicular traffic,” ayon sa talumpati ng Pangulo.
“If there is a mayor or a governor, or kung ano kang — sino kang demonyo ka, i-suspend mo Sir Año. Give him time and if he cannot — if he is not up to it, then pagpahingain mo na lang. Suspend mo na. Wala talagang — wala tayong magawa,” dagdag ng Pangulo.
