Nakaligtas sa pamamaril nitong hapon ng August 11 ang isang dating kapitan ng Barangay Victoria, San Andres, Romblon habang patay naman ang driver ng motorsiklong kanyang sinasakyan.
Kinilala ang dating Kapitan na si Melchor Mediado, habang ang namatay naman nitong kasama ay si Michael Edrat, 27.
Nangyari ang pamamaril sa kahabaan ng Tablas Circumferential Rd. sa Barangay Mabini sa parehong bayan.
Ayon sa inisyal na ulat ng pulisya, patungong Odiongan ang dalawa mula sa isang sabungan sa parehong Barangay nang biglang pagbabarilin ng riding-in-tandem pagdating nila sa may boundary ng Barangay Mabini at Tan-agan.
Dead on the spot si Edrat habang naisugod naman sa Romblon Provincial Hospital ang dating kapitan na nagtamo ng tama ng bala sa pisngi.
Sa panayam ng Romblon News Network kay Police Captain Edwin Bautista ng San Andres Municipal Police Station, sinabi nitong tinitingnan na nila ang mga CCTV video sa posibleng dinaanan ng mga hindi pa nakikilalang mga suspek.
Nakipag-ugnayan na ang San Andres Municipal Police Station sa mga kapulisan sa Odiongan para sa manhunt operation laban sa mga suspek.
