Pitong miyembro ng isang pamilya ang lumikas ngayong hapon sa kanilang bahay sa Sitio Canlumay, Barangay Tumingad sa Odiongan matapos itong pasukin ng mga bato at putik galing sa isang sapa.
Ayon sa Municipal Disaster Risk Reduction Office (MDRRMO) ng bayan ng Odiongan, ang bahay na pagmamaya-ari ni Elvie Jobillo ay pinasok ng rumaragasang mga bato bandang alas-3:30 ng hapon nitong Martes kasabay ng kasagsagan ng malakas na buhos ng ulan.
Kwento ni Jobillo sa Romblon News Network, malakas ang ulan umano sa kanilang lugar nang bigla nalang silang makarinig ng mga gumugulong na bato at maya-mayang tumama na nga sa kanilang bahay kasabay ng putik at tubig.
Agad naman umano niyang inilikas ang dalawa niyang anak, kabilang ang isang 2 taong gulang na bata, papunta sa hindi natabunan ng kalsada. Maswerte naman umanong nasa paaralan ang tatlo pa niyang anak kaya hindi siya nahirapan ilikas ang mga naiwan sakanya.
Sinabi naman ng asawa ni Jobillo na nalimas at dinala ng rumaragasang tubig ang ilan nilang gamit at mga alaga nilang manok.
Pansamantala naman umano muna silang makikitira sa bahay ng kanilang kamag-anak habang nag-aantay na gumanda ang panahon para gumawa ng panibagong titirhan.
Nangako na ng family pack ang Local Government Unit ng Odiongan na ibibigay sa pamilya para may magamit habang nakikitira muna.
Ang pag-uulan sa Romblon na naranasan ngayong araw ay dahil sa hanging Habagat.
