Dalawang lalaki ang isinugod sa Romblon Provincial Hospital nitong Linggo ng gabi matapos masangkot sa isang aksidente sa kahabaan ng Tablas Island Circumferential sa Barangay Gabawan, Odiongan, Romblon.
Ayon sa imbestigasyon ng pulisya, patungong town proper ang tricycle na minamaneho ni Romeo Fornea Galario, 19, sakay ang 3 menor-de-edad na pawang mga residente ng Lawan, Alcantara, nang biglang salpukin sila ng kasalubong nilang motorsiklo na nawala sa linya.
Sa lakas ng pagkakasalpok, tumilapon ang rider mula sa kanyang motorsiklo na kinilalang si Jaypee Gembojal Chavez, 32, residente ng parehong Barangay, dahilan para magkaroon siya ng sugat sa katawan.
Samantala, nasugatan rin ang isa sa mga menor de edad na sakay ni Galario matapos tumilapon rin mula sa tricycle.
Ayon sa Odiongan Municipal Police Station, parehong walang mga Driver’s License ang dalawang rider na sangkot sa aksidente.
Pansamantala munang dinala sa pulisya ang kanilang mga sasakyan habang patuloy na iniimbestigahan ang pangyayari.
