Tiklo matapos ang napakatagal na pagtatago ang isang lalaking wanted sa pagnanakaw at pagpatay sa isang miyembro ng Philippine Marines noong 1989 sa Puerto Princesa, Palawan.
Kinilala ni Police Captain Dennis Rivera, hepe ng Provincial Intellegince Branch ng Romblon Police Provincial Office, ang naarestong suspek na si Roberto Teologo, 54.
Batay sa impormasyon ng pulisya, si Teologo ang suspek sa pagnanakaw at pagpatay kay Sgt. Ernesto Suelo noong 1989 sa VRC Airstrip Post sa WESCOM, Puerto Princesa City.
Ayon pa kay Rivera, 29 years nagtago ang suspek hanggang sa madakip nila nitong hapon ng Huwebes, June 20, sa Sitio Cambiao, Barangay Guinbirayan, Santa Fe, Romblon kung saan siya umano huling nagtago.
Dala nila ang isang Warrant of Arrest na nilabas ng Regional Trial Court Branch 50 Puerto Princesa City laban sa suspek dahil sa kasong ‘Roberry with Homicide'.
Maliban sa Santa Fe, nakaabot rin umano ng ibang bansa ang suspek para lang makapagtago sa batas.
Ang operasyon laban sa suspek ay ikinasa ng PIB Romblon PPO sa pangunguna ni Team Leader PCMS Allan Fruelda, RPMFC sa pangunguna ni PMSG Dandy Fojas, Sta. Fe MPS sa pangunguna ni Plt. Mary Jade Gaca, at mga tauhan ng Puerto Princesa Police Office sa pangunguna ni PLtCol. Alfonso Tabi Jr.
