Tiklo matapos ang halos anim na taong pagtatago ang isang lalaking wanted sa Odiongan, Romblon dahil sa kasong murder.
Kinilala ni Lieutenant Colonel Socrates Faltado, hepe ng Regional Public Information Office ng RPIO-MIMAROPA, ang suspek na si Ruben Alota Fetalco, ika-apat na most wanted ng bayan ng Odiongan.
Naaresto si Fetalco nitong hating gabi ng Lunes, June 10, sa Brgy. Ibarra, Iloilo City matapos makatanggap ng tip ang mga tauhan ng Odiongan Municipal Police Station at Police Station 1, Iloilo City na naroon ang suspek.
Ayon sa pulisya, October 2013 pa ang warrant of arrest ng suspek na nilabas ni dating Judge Madrid ng Regional Trial Court Branch 82.
Tinuturo ang suspek na pumatay di umano kay Avelino Baldera noong 2013 sa pamamagitan ng pagtaga sa biktima gamit ang isang matalim na bagay.
Nakakulong na ngayon ang suspek sa Iloilo City at inaasahang ibabiyahe pabalik ng Odiongan para iharap sa korte.
Walang piyansa ang kaso ni Fetalco.
