Bukas na sa publiko matapos ang halos isang taong trabaho ang sinemento at inayos na Canduyong-Anahao Provincial Road sa bayan ng Odiongan sa Romblon.
Pormal na itong ininagurahan nitong Martes, June 18, sa pangunguna ni incumbent Romblon Governor Eduardo Firmalo at Odiongan Mayor Trina Firmalo-Fabic.
Ang nasabing road upgrading ay ipinagawa ng Provincial Government sa pamamagitan ng Conditional Matching Grant ng Department of Interior and Local Government na nagkakahalaga ng mahigit P64-million para sa 1,155.25 linear meter na kalsada.
“Nakuha natin yung pondo sa DILG bilang pabuya ng mga natanggap natin mga award sa probinsya katulad ng Seal of Good Governance, Housekeeping, at iba pa,” ayon kay Firmalo.
Malaking tulong sa mga residente ng Barangay Canduyong ang nasabing proyekto dahil noon umano ay masikip at rough road pa kaya pahirapang makadaan kahit mga motorsiklo lalo kung umuulan.
Sa ngayon, may kaunting bahagi nalang ng kalsada ang hindi pa natatapos pero inaasahan itong matapos bago magpalit ng taon.
Ayon sa mga residente na nakausap ng Romblon News Network, madalas ng dinadaanan ng mga sasakyan ang nasabing daan lalo pa umano ngayong sarado ang Budiong-Odiongan Road dahil sa ginagawang tulay sa Barangay Tabin-Dagat.