Pinangunahan ng mga guro ng Romblon State University at empleyado ng Local Government Unit ng Odiongan ang pagdiriwang sa Romblon ng ika-121 anibersaryo ng Independence Day ng Pilipinas ngayong araw, June 12.
Bago magkaroon ng parada paikot sa bayan, nag-alay muna ng mga bulaklak sa bantayog ni Rizal ang mga empleyado ng RSU, mga empleyado at opisyal ng munisipyo, mga empleyado ng iba't ibang Government Agencies, kasama ang mga guro at estudyante ng DepEd. Suot ng mga pumarada ang iba't ibang kasuotan na makikita sa Luzon, Visayas at sa Mindanao.
Matapos ang parada, nagkaroon ng maikling programa sa Odiongan Public Plaza kung saan nagtanghal ng iba't ibang folk dance ang mga estudyante at guro ng Romblon State University.
Naging panauhing pandangal naman si Romblon Governor Eduardo Firmalo sa nasabing pagdiriwang.
Sa hiwalay na aktibidad, nagkaroon naman ng Jobs Fair ang Department of Trade and Industry at ang Department of Labor and Employment sa loob ng campus ng Romblon State University kung saan aabot sa mahigit 1,000 mga naghahanap ng trabaho ang dumagsa.
Magmula sa trabaho sa construction, hanggang sa mga fastfood chain, at mga trabaho abroad ay may available na slot.
Isa sa mga Hired On The Spot sa job fair ay ang bagong graduate na PWD na si Maria Nelda Bullos, kahit naka wheelchair siya pumunta parin siya sa job fair para maghanap ng trabaho. Natanggap siyang encoder sa opisina ng Department of Labor and Employment – Romblon.
Ayon kay Bullos, hindi kailangang magkulong lang sa tahanan ng mga PWD kundi makisalamuha rin sa ibang tao kagaya niyang naghanap ng trabaho sa kabila ng kanyang kalagayan.
“Kahit ganito ako, parang hindi po hadlang ang magkaroon ng kapansanan para makita ko ‘yung realidad ng mundo,” ayon kay Bullos.
Maliban sa job fair, nagkaroon rin ng Trabaho-Negosyo Seminar ang DTI para sa mga gustong magtayo ng business sa probinsya.
