Binawian ng buhay sa Romblon Provincial Hospital ang isang rider matapos masangkot sa salpukan ng dalawang motorsiklo sa bayan ng Odiongan nitong hapon ng Linggo, May 12.
Kinilala ang nasawi na si Edgar Ferrancullo Fadri, residente ng Barangay Tabobo-an.
Batay sa imbestigasyon ng Odiongan Municipal Police Station, magkasalungat na binabaybay ng biktima sakay ang isang backrider, at ng isa pang motor na minamaneho naman ni George Ramos, ang kahabaan ng National Road sa Barangay Tulay nang bigla umanong kumabig sa kabilang linya si Ramos dahilan upang masalpok ang motorsiklo ng biktima.
Sa lakas ng pagkakasalpok, nagkasira-sira ang dalawang motorsiklo habang tumilapon naman ang mga sakay nito.
Agad na isinugod ang dalawa sa ISIAH Hospital & Medical Center matapos magtamo ng sugat sa iba't ibang bahagi ng katawan habang sa Romblon Provincial Hospital dinala ang driver na si Edgar Ferrancullo Fadri dahil sa malubhang lagay nito. Binawian ng buhay kinalaunan ang biktima sa RPH habang ginagamot.
Lumalabas sa imbestigasyon ng pulisya na lasing si Ramos ng mangyari ang aksidente. Wala rin umanog suot na helmet ang tatlong mga nasangkot sa aksidente.
