Sugatan ang isang construction worker sa bayan ng San Andres, Romblon matapos malapitang umanong barilin ng isang gunman nitong madaling araw ng Miyerkules, May 8.
Kinilala ang biktima na si Juny Fajilagot, 45-anyos, residente ng Sitio Sanghiran, Barangay Agpudlos, San Andres, Romblon.
Batay sa kwento ni Fajilagot sa Romblon News Network, bandang 4:30 ng madaling araw umano ng may dumating na dalawang lalaking nakamotor sa kanilang bahay at hinanap siya. Lumabas si Fajilagot sa akalang ang dumating ay ang naghahatid ng tinapay na pangtinda nila, ngunit paglabas nito sa pintuan ay tinutukan na agad siya baril ng suspek na nakasuot ng bunnet at tambon sa mukha.
Napaupo nalang umano ang biktima sa isang upuan habang pinagsisigawan siya ng suspek. Hindi nagtagal, nagpaputok ang gunman sa upuan kung saan nakaupo ang biktima at pagkatapos ay naglakad palayo, bago pa man tuluyang umalis, nagpaputok umano ito ulit at dito na tinamaan ang biktima sa kaliwang paa.
Agad namang kumaripas ng takbo ang mga gunman at sumakay sa kasama niyang nakamotorsikling nag-aantay umano sakanya. Nagsumbong naman agad ang biktima sa San Andres Municipal Police Station matapos ang insidente.
Ayon sa pulisya, nakakuha sila ng dalawang slug sa crime scene at ito umano ay dinala na nila sa crime laboratory para sa examination. Patuloy umano ang ginagawa nilang imbestigasyon patungkol sa krimen.
Ligtas na ngayon ang lagay ng biktima.
