Tiklo sa pinagsamang pwersa ng Odiongan Municipal Police Station at ng Provincial Mobile Force Company ang isang lalaking bumabiyahe na may dalang baril sa bayan ng Odiongan nitong gabi ng Lunes.
Kinilala ni Police Capt. Manuel Fernandez Jr., hepe ng Odiongan Municipal Police Station, ang suspek na si Edgar Flores Gaad, residente ng Barangay Tulay.
Ayon sa pulisya, naglatag sila ng checkpoint sa Barangay Tulay bandang alas-9 kagabi nang biglang dumaan ang suspek, pinara nila ito dahil tila nakainum ang suspek at gumegawang sa pagmamaneho ngunit hindi tumigil ang suspek.
Hinabol ng otoridad ang suspek at dito na nila napansin na may handle ng baril na nakalabas sa sling bag na dala ng suspek. Agad itong inaresto matapos makuhaan ng isang caliber .38 revolver, at anim na bala.
Sinabi ni Fernandez na hindi nagpakita ng lisensya at permit mula sa COMELEC si Gaad na kalaunay napag-alamang tinuturong suspek sa pagpatay kay Dr. Martin Morgado noon.
Nakakulong na ito ngayon at nahaharap sa kasong paglabag sa election gun ban.
