Isang 29 anyos na babae ang ‘nagpakasal’ sa yumao nitong boyfriend bago ito ilibing nitong nakaraang Linggo sa Romblon.
Nagsuot ng puting damit pangkasal si Jing Jing Vertucio para sa seremonya ng kanilang kasal sa Pato-o Foursquare Gospel Church sa bayan ng Odiongan.
Sa panayam ng Romblon News Network kay Jing Jing, sinabi nito na mahigit sampung taon na silang nagsasama ng kanyang boyfriend na si Elvis Novicio hanggang ang huli ay mamatay matapos bangungotin sa gitna ng mahimbing na pagtulog.
Sa nasabing seremonya, binanggit ni Jing Jing ang kanyang mga pangako kay Elvis kagaya ng pagpapatuloy sa pag-aalaga at pagmamahal sa kanilang dalawang anak.
‘Last week ng February, sa Manila, pabiro niya sa akin, ‘Will You Marry Me?’, dalawang beses niya sinabi sa akin. Sabi ko sakanya, huwag mo ako lokohin. Sabi ko, nagbibiro ka lang eh, kasi sa pagsasama natin, never mo sinabi yan,” ayon kay Jing Jing.
“Sa pagtatanong niya sa aking ‘Will You Marry Me’, hindi ko alam na ‘yun na pala yung last naming pagkikita,” dagdag pa nito.
Ang nasabi umanong wedding ceremony ay isang pagpapakita ng kanyang totoo at seryosong pagmamahal sa kanyang yumaong boyfriend.
“Kaya sa kahuli-hulihang pagkakataon maraming salamat sayo, kahit hindi mo ako naririnig, MAHAL NA MAHAL KITA. Magkikita rin tayo balang araw sa piling ng ating Diyos. Gagawin ko lahat, susundin ko lahat ng bilin mo sa akin,” sabi ni Jing Jing bago niya lapitan ang ataol ni Elvis at halikan ang salamin rito.
Samantala, sinabi ni Rev. Jerry Fornal, officiating pastor sa seremonya, na invalid ang kanilang kasal dahil hindi masusunod ang nakasaad sa Family Code of the Philippines na nagsasabing dapat magbigay ng consent ang dalawang partido na hindi na magagawa ng isang patay.
“Pinagbigyan ko lang siya sa seremonya kasi nakikita ko ‘yung totoo niyang pagmamahal sa boyfriend niya, pero wala kaming pinirmahan na papel,” pahayag ni Fornal.
