Inireklamo ng pamilya ng isang Grade 8 student ng Holy Rosary Academy sa San Agustin, Romblon ang isa sa mga teacher nito matapos di umanong paluin ang bata sa kamay at suntukin ito sa tiyan.
Kinilala ang teacher na si Joel Cagurangan, adviser ng nabanggit na bata.
Ayon sa tiyahin ng bata, hapon umano ng March 25 nang pasingawin ng bata at ng mga kasama nito ang bisekleta ng teacher kaya ito nagalit at nasaktan ang kanyang pamangkin.
Matapos ang insidente, tumakbo ang bata patungo sa kanilang bahay at nagsumbong sa kanyang magulang, dahilan para lumapit sa San Agustin Municipal Police Station ang pamilya para kasuhan si Cagurangan.
Matapos na maipa-medical ang bata, agad na inaresto ng mga rumespondeng pulis ang guro sa loob ng campus.
Desidido umano ang pamilya ng bata na kasuhan si Cagurangan dahil sa trauma na inabot nito mula sa guro.
Sinampahan na ng kasong Child Abuse o paglabag sa Republic Act 7610 ang suspek sa piskalya at pansamantala munang pinalaya habang tinitingnan kung may probable cause ang inihain na kaso.
Sinisikap na kunan ng pahayag ng Romblon News Network si Cagurangan sa pamamagitan ng message sa Facebook ngunit hindi pa ito sumasagot sa aming mensahe.
