Hinihikayat ng isang eksperto sa agricultural sciences ang publiko na bawasan ang pagkain ng white rice para makatulong sa pagliit ng bilang ng mga taong obese sa Pilipinas.
Sinabi ni Dr. Eufemio Rasco Jr., chairman ng National Academy of Science and Technology (NAST) agricultural sciences division, na ang white rice ay puno ng carbohydrates at mataas umano ang glycemic index.
“Bagamat nasa kultura na ng Pilipino ang pagkain ng kanin mula umaga hanggang gabi para maging source ng lakas natin, tingnan rin natin na may iba pang pwedeng source ng lakas natin,” pahayag ni Rasco.
Pinaliwanag nito na maliban sa carbohydrates, pwede ring gamitin ng katawan ng tao ang fats at protein para pagkunan ng lakas ng isang tao.
Sinabi rin nito na batay sa mga pag-aaral, ang pagdami ng sugar sa katawan ang dahilan ng pagiging mataba ng tao at hindi ang kinakaing taba.
Pwede umanong alternatibo sa refined grain rice o white rice ay ang brown rice dahil meron umano itong dietary fibre, antioxidants, phytic acid at polyphenols na makakatulong sa pagkontrol ng blood sugar level sa katawan ng tao.
Sinabi rin ni Rasco na layunin ng National Academy of Science and Technology (NAST) agricultural sciences division na hikayatin ang publiko na magtanim rin ng iba pang food crops maliban sa palay.
Ayon kay DOST-Romblon Provincial Director Marcelina V. Servañez, nagsagawa ang kanilang ahensya ng two-day forum nitong March 25 hanggang 26 para sa mga kabataan sa Romblon State University Main Campus para hikayatin sila na pumasok sa Science.
Maliban ka Dr. Rasco, nagsalita rin sa forum sina Ms. Luningning Samarita-Domingo, Director IV ng NAST Philippines; Academician Marco Nemesio Motaño at Academician Jose Maria Balmaceda, pawang mga member ng NAST Philippines; Dr. Percival Almoro ng UP Diliman; Dr. Maribel Dionisio-Sese ng UP Los Baños; at Dr. Violeta Villegas, isang Retired Scientist.
Ang National Academy of Science and Technology ay isa sa mga sangay ng Department of Science and Technology.
