Nagtamo ng sugat sa mukha ang isang 38 anyos na lalaki sa Sitio Sampaloc, Brgy. Punta, Looc, Romblon matapos na tagain ng nakasalubong niyang lasing nitong madaling araw ng Sabado, March 23.
Kinilala ang biktima na si Jarry Lorenzo Gaguis, residente ng nabanggit na lugar; habang ang suspek ay si Reynaldo Glori Atilano, 51 anyos, residente ng Brgy. Poblacion sa parehong bayan.
Ayon sa police report na nakarating sa opisina ni Police Senior Inspector Ledilyn Ambonan, spokeperson ng Romblon Police Provincial Office, naglalakad mula sa inuman ang biktimang si Gaguis nang makasalubong nito ang suspek na may dalang bolo, at walang-kaabug-abog ay tinaga ang biktima.
Nagtamo ng sugat sa kanang bahagi ng mukha si Gaguis kaya agad itong isinugod na mga tumulong sa Don Modesto Formilleza Sr. Memorial Hospital at ngayo'y inoobserbahan ang lagay.
Agad namang tumakas ang suspek at ngayo'y patuloy na pinaghahanap ng mga tauhan ng Looc Municipal Police Station.
Hindi pa malinaw kung ano ang posibleng dahilan ng suspek kung bakit nito tinaga si Gaguis na naglalakad lang umano noong oras na iyon.
