Nahulicam sa bahagi ng National Road sa Barangay Libertad, Odiongan, Romblon ang pagkakahagip ng isang L300 Van sa isang estudyanteng naglalakad sa gilid ng kalsada nitong hapon ng Miyerkules, March 20.
Sa kuha ng cctv ng Barangay Libertad, makikita na tumawid ng kalsada ang biktimang si Rhenajane Fabello Manchete, galing sa kanyang paaralan sa Libertad National High School, at naglalakad sa gilid ng kalsada nang biglang dumating sa likod nito ang isang L300 Van na minamaneho ni Carlito Selodio Fajarito, 43, driver ng DPWH-Romblon.
Sa isa pang kuha ng cctv makikita ang pagtigil ng van kasabay nito ang pag gulong ng babaeng biktima sa gilid ng kalsada.
Agad namang bumaba ang mga sakay ng van na mga empleyado ng DPWH para tulungan ang estudyanteng babae.
Ayon sa mga saksi, nahagip parin ng van ang estudyanteng babae kahit na nasa gilid na ito ng kalsada.
Naisugod sa Romblon Provincial Hospital ang biktima ngunit kinailangang dalhin sa Manila para mas matingnan ng mga doktor ang kanyang sitwasyon matapos na magtamo ng sugat sa ulo.
Samantala, pinalaya na ng Odiongan Municipal Police Station ang driver matapos ang isang gabing pagkakulong nito matapos na magkasundo ito at ang pamilya ng biktima na tutulungan nalang nito ang pagpapagamot sa biktima sa ospital.
