Nagtamo ng malubhang sugat sa paa ang tour guide na si Remy Robiso matapos na maaksidente sa motorsiklo nitong hapon ng Martes, February 19, sa Barangay Pili, bayan ng San Fernando sa Sibuyan Island.
Batay sa imbestigasyon ng San Fernando Municipal Police Station, papaliko na sana mula sa intersection ang tricycle na minamaneho ni Valentine Romano De Asis ngunit napansin nito na paparating ang rider na si Robiso kaya bigla siyang tumigil ngunit dahil umano nakaangat na siya sa kalsada at sa mabilis na patakbo ni Robiso nahagip parin ang side wheel ng kanyang tricycle dahilan upang mawalan ng kontrol si Robiso sa kanyang motor at mag-crash sa concrete pavement.
Ayon sa spot report na nakarating sa opisina ni Police Senior Inspector Ledilyn Ambonan, spokeperson ng Romblon Police Provincial Office, agad na dinala si Robiso sa Rural Health Unit ng San Fernando ngunit inilipat rin ng Sibuyan District Hospital sa Cajidiocan dahil sa natamong sugat sa paa at leeg.
Napag-alaman na walang driver's license si De Asis na nagmamaneho ng nasabing tricycle.
Dinala na muna sa San Fernando Municipal Police Station ang dalawang sasakyan sangkot habang patuloy na iniimbestigahan ng pulisya ang aksidente.
