1 Juan 4:7 “Mga minamahal, mag-ibigan tayo sa isa’t-isa sapagkat ang pag-ibig ay mula sa Diyos. Ang bawat isang umiibig, ang kanilang kapanganakan ay mula sa Diyos at nakakilala sa Diyos.” Ilang araw na lang at selebrasyon na naman ng Araw ng mga Puso. Marami na naman ang magpaparamdam at magpapadama ng pag-ibig sa kanilang mga minamahal. Pero bago ang araw na ito ay ang aking kaarawan. Ika-13 ng buwan ng Pebrero 1987, nang ako’y ipinanganak at sa paniniwala ang numero 13 ay malas at ang buwan naman ng Pebrero ay kulang. Ang masaklap pa nito ay araw pa ng Biyernes nang ako’y isilang na pinaniniwalaan din ng karamihan na ang araw na ito ay malas. Sa nangyari sa akin, masasabi nga na napakamalas ko naman talaga sa buhay. Malas pa sa pag-ibig dahil ako’y isang dalagang Ina. Kung papatulan ko nga talaga ang paniniwalang ito, pwede kong sabihin na napakalupit nga naman ng tadhana sa akin.
Pero hindi ko kailanman pinaniwalaan ang ganitong mga kasabihan. Para sa akin ang lahat ng nangyari sa buhay ko ay isang malaking aral at malaking biyaya. Dahil sa mga nangyari sa akin ay marami akong napagtanto sa buhay at natutunan. Nadama ko kung gaano kabuti ng Diyos at ang kanyang mga kahanga-hangang paraan para maipadama Niya ang pag-ibig sa akin. Hindi ko kaylanman ikinahiya na ako’y isang single mother. Dahil sa ako’y nagmahal lamang noon at iyon ay isa sa mga magagangdang nangyari sa nakaraan ko. Mapait man ang naging karanasan ko dahil ako’y nabigo, nasaktan at iniwan pero may anak naman ako na sa akin ay nagmamahal ng lubusan sa kasalukuyan. Ilang beses din ako na nahusgahan noon ng mga taong ang pananaw sa mga dalagang nabuntis ng wala sa oras ay parang isang taong kriminal. Mapanghusgang mga mata at masasakit na pananalita. Pero taas noo ako noon habang pinagbubuntis ko ang aking anak. Naghanapbuhay ako hanggang sa araw ng aking kabuwanan. Hindi ko iniasa ang lahat sa aking pamilya.
Naghanapbuhay ako hanggang sa makakaya ko at nag-ipon ako ng pera para sa panggastos sa araw ng aking panganganak. Wala din na kahit piso na suporta ang natanggap ko mula sa kanyang Ama. Ang pag-ibig ay sadyang may kaakibat na kabiguan. Hindi yan maiiwasan at hindi mo pwedeng takasan. Kagaya lang din ng mga pagsubok sa buhay. Pero para sa akin, ang wagas na pag-ibig ay nagmumula sa Diyos. Dahil sa walang hanggan Niyang pagmamahal sa atin kaya nakakayanan natin ang lahat ng mabibigat na pinagdadaanan natin sa buhay. Sa sitwasyon na meron ako, masasabing nakakapanlumo at nakakalungkot ang buhay na meron ako. Pero para sa akin ako ay pinagpala at ako ay masaya. Dahil mas pinaiiral ko ang pagmamahal ko sa aking sarili, pagmamahal ko sa aking anak, sa aking pamilya at mga kaibigan. At higit sa lahat ay mas kinakapitan ko ang pagmamahal ni Lord sa aming buhay. Iniiisip ko pa lang ang love ni God para sa akin at sa anak ko ay napapangiti na ako.
Ang pang-ibig ng Diyos ay tunay, tapat at totoo. Di Niya tayo kailanman iiwan at di Niya tayo kailanman bibiguin. Walang kapaitan at walang pagluha. Dahil si Lord, wagas ang Kanyang kabutihan sa atin. Marami man sa atin ang manakit, magpaluha, mang-iwan at magpaasa lamang pero hindi an gating Diyos. Lagi lang natin basahin ang Kanyang love letter sa atin…ang Bibliya. Dahil nakasulat dito ang lahat ng Kanyang mga pangako, mga kasagutan at kung gaano Niya tayo pinapahalagahan at minamahal.
Masarap magmahal at nakakatanggap ng pagmamahal. Pero tatandaan natin, tayo ay masasaktan rin. Dahil hindi tayo pwedeng magmahal kung hindi tayo handang masaktan. Gaya ng pagmamahal ni Lord sa atin. Masasaktan tayo sa mga pagsubok na ibinibigay Niya sa ating buhay pero ito ay simbolo lamang ng Kanyang pag-ibig sa atin. Gusto Niya lamang na tayo ay magtiwala sa Kanya at maniwala. At dahil sa Kanyang pagmamahal sa atin, kaya Niya tayo binibigyan ng mga suliranin dahil alam Niya na kaya natin ito. Ang mga pagsubok din ay isang paraan para maitama Niya ang ating buhay. Na ang lahat ng nangyayari sa atin, kanais-nais man o hindi ay may maganda Siyang dahilan at plano para sa ating hinaharap.
Patuloy lang tayo na magtiwala, maniwala at manampalataya sa Kanya.
