Ang National Nutrition Council (NNC) at Romblon State University ay nagpaplanong magtayo ng Nutriskwela Community Radio Station sa lupaing pag-aari ng nabanggit na unibersidad, na matatagpuan sa Bgy. Agpudlos. San Andres, Romblon.
Layunin ng proyektong ito na mapalaganap, sa pamamagitan ng radyo, ang kaalaman ng mga taga-Romblon ukol sa nutrisyon at kung paano pangalagaan nang wasto ang kalusugan partikular ng mga bata.
Kaugnay nito, ang mga kinatawan ng NNC – NCR at NNC Mimaropa ay nagsagawa ng ocular inspection sa lokasyon na posibleng pagtayuan ng naturang istasyon ng radyo upang makita kung mas makakapagbato dito ng signal sa mas malayong lugar.
Sinabi ni G. Francisco Flores ng MQ Mediazone Productions, na sila ang katuwang ng NNC sa pagsasagawa ng pag-aaral kung saan magandang itayo ang isang istasyon, pagtatayo ng tower, paglalagay ng radio transmitter at iba broadcast equipment hanggang sa pagbibigay ng hands-on training on community radio broadcasting para sa magsisilbing anchor ng programa.
Ayon kay Jomarie Tongol, NIED-NNC, tanging 40 porsiyento ng airtime sa radyo ang gagamitin ng NNC sa pagpapalaganap ng impormasyon ukol sa kalusugan at ang ang RSU na ang bahalang gumamit sa 60 porsiyentong nalalabing airtime para sa kanilang mga lokal na programa.
Maaari rin aniyang gamitin ng iba pang ahensiya ng pamahalaan ang community radio para sa pagpapalaganap ng tama at napapanahong impormasyon ukol sa kalusugan at nutrisyon gayundin sa iba pang proyekto at programa ng pamahalaan.
“Kapag natuloy ang paglalagay ng 100 watts Nutriskwela Community Radio Station sa bayan ng San Andres, ito ang pang 50 himpilan ng radyo na itinatag ng NNC sa iba’t ibang panig ng bansa,” pahayag ni Tongol.
Ikinagalak naman ni RSU President Arnulfo De Luna ang magandang balak ng NNC at handa silang tulungan ang nasabing ahensiya upang maisakatuparan ang pagtatayo ng community radio sa loob RSU Agpudlos Campus na makakatulong din sa kanila para maiparating sa mga Romblomanon ang kanilang programang pang-edukasyon. (DMM/PIA-MIMAROPA/Romblon)
