Muntik matanggal ang taenga ng isang babae sa bayan ng Odiongan, Romblon matapos na sugurin at masugatan ng isang matalim na bagay na hawak umano ng asawa ng kanyang kalaguyo nitong umaga ng Martes, February 19.
Ayon sa 18-anyos na dalaga na si alyas ‘Kim', sadya naming tinago ang kanyang pangalan alinsunod sa kanyang kahilingan, bandang alas-7 ng umaga kanina matapos siyang mag log-in sa kanyang pinagtatrabahuan sa loob ng Odiongan Commercial Center ay bigla umano siyang kinausap ng anak ng kanyang kalaguyo at kinompronta kung may relasyon ba talaga sila ng ama nito.
Hindi umano nagtagal ay dumating si alyas ‘Queeni', 20 taon ng asawa ng kalaguyo ni alyas ‘Kim', at dito na sila nagkasagutan hanggang sa magkagulo at magkasabunutan.
Ayon kay alyas ‘Kim', may nakuha umanong isang matalim na bagay si alyas ‘Queeni' at itinusok-tusok umano ito sa kanyang ulo, at sa kanyang taenga dahilan upang mapunit ito at dumugo.
Agad na inawat ng mga saksi ang dalawa, at pinatakbo si alyas ‘Kim' patungo sa Odiongan Municipal Police Station at kalaunan ay dinala sa Rural Health Center ng Odiongan para gamutin at tahiin ang sugat.
Dipensa ni alyas ‘Quenni', nang dilim umano ang kanyang mata matapos na makita na nagkakasagutan ang anak niya at ang kalaguyo ng kanyang asawa kaya niya nagawang sumugod at masaktan ang biktima.
Matapos mag-usap ng dalawang panig sa Odiongan Municipal Police Station, nagkasundo nalang silang huwag ng magsampa ng kaso laban sa isa't isa.
Sinabi naman ni alyas ‘Kim' na makikipaghiwalay na ito sa asawa ni alyas ‘Quenni' para umano matapos na ang gulo.
