Pormal na nanumpa sa kanilang propesyon ang 334 na bagong guro sa lalawigan ng Romblon.
Idinaos ang 34th Oath Taking Ceremonies for New Professional Teachers ng mga pumasa sa nakaraang September 2018 Board Licensure Examination for Professional Teachers (BLEPT) na ginanap sa quadrangle ng Romblon State University (RSU) – Main Campus sa bayan ng Odiongan.
Ang pormal na pannumpa ay pinangunahan ni Reynaldo V. Cristobal, Officer-in-Charge ng Professional Regulation Commission (PRC) – Lucena Regional Office.
Sinabi ni Director Cristobal na ang pagkakapasa sa board exam ng isang guro ay hudyat pa lamang ng panibagong hamon na kinakailangang harapin ng mga ito.
“Don’t just treat it as a profession, as mere task but a social responsibility (Huwag ituring na ito ay isa lamang propesyon o isang gawain, bagkus ito ay responsibilidad sa komunidad)”, makahulugan nitong tinuran.
Hinimok din nito ang mga bagong pasa na gampanan ang kanilang bagong tungkulin – ang pagiging guro para sa bansang Pilipinas.
Ang lalawigan ng Romblon ay karaniwang kasama sa listahan ng mga Testing Center para sa second phase ng BLEPT na ginaganap tuwing Setyembre kada taon kung saan 367 na graduate ng Romblon State University (RSU) ang pumasa sa nasabing pagsusulit noong 2018.
Sa talumpati ni Governor Eduardo Firmalo sa harap ng mga bagong guro ay kanyang inihayag ang kagalakan dahil sa patuloy ang pagiging produktibo ng Romblon State University sa paghubog ng mga kabataang nagiging propesyonal sa kurso nitong pinag-aralan. Patunay aniya nito ang mataas na porsiyento ng mga nakakapasa sa licensure examination na ibinibigay ng PRC.
Sa maikling pahayag ni RSU President Arnulfo De Luna, kanyang sinabi na karangalan ng unibersidad at buong lalawigan ang pagdami ng board passers sa hanay ng mga guro.
Kanya ring pinasalamatan ang pamahalaang panlalawigan ng Romblon sa pakikipagtulungan ni Public Employment Service Office o PESO Provincial Manager Alicia C. Fetalvero at maging sa pamunuan ng PRC Lucena sa pag-arrange ng oath taking ceremonies ng mga bagong License Professional Teachers sapagkat mas nakatipid ang mga ito sa gastusin. (DMM/PIA-MIMAROPA/Romblon)
