Posibleng mabalian ng paa ang isang rider sa matapos masangkot sa salpukan ng dalawang motorsiklo sa kahabaan ng tablas island circumferential road sa Barangay Panique, Odiongan, Romblon bandang 10:40 ng gabi nitong Linggo, January 27.
Ayon kay PO3 Raymond M Rombines, imbestigador ng Odiongan Municipal Police Station, galing ang rider na nabalian ng paa na kinilalang si Jeff Acosta Fernandez sa Barangay Matutuna, San Andres at pauwi na sana ng Barangay Panique, Odiongan nang makasalpukan ang isa pang rider na kinilala na si Christy Gadon Rioja, sakay ang kanyang backride na si Robel Aungon Mansalay.
Nag-overtake umano sa isang sasakyan si Rioja, dahilan para mapunta ito sa linya ni Fernandez at masalpok ito.
Mabilis umano ang patakbo ni Rioja at nakainum rin umano sila ng kanyang backride, ayon sa imbestigasyon ng Odiongan Municipal Police Station. Wala ring suot na helmet ang tatlong sangkot sa aksidente.
Agad na dinala ang tatlong sangkot sa Romblon Provincial Hospital upang gamutin ang kanilang natamong sugat sa iba't ibang bahagi ng katawan.
Paalala ng Odiongan Municipal Police Station, huwag magmamaneho kung nakainum para iwas disgrasya.
