Nasunog ang isang bungalow type na bahay pasado alas-3 nitong hapon ng Linggo, January 06, sa Sitio Cocoville, Barangay Dapawan sa bayan ng Odiongan, Romblon.
Ayon kay Senior Fire Officer 2 Joey Selorio ng Bureau of Fire Protection sa Odiongan, ang bahay ay pagmamay-ari ni Gerardo Ibabao, isang retiradong pulis.
Wala umanong tao sa bahay nang manyari ang insidente dahil nasa isang birthday party na dinaluhan ang buong pamilya ni Ibabao.
Kwento ng anak ni Ibabao na si JR, bandang alas-3 ng hapon nang may pumunta sa resort at nagsumbong sa kanila na nasusunog ang kanilang bahay kaya agad silang bumalik sa bahay ngunit malaki na umano ang apoy pagdating nila.
Ayon pa kay SFO2 Selorio, nagsimula umano ang sunog sa isang kwarto na nasa likod na bahagi ng bahay at mabilis na kumalat sa sala at sa isa pang kwarto. Agad naman umanong dumating ang mga tauhan ng Bureau of Fire Protection kaya napigilang madamay ang kwarto ni Gerardo at ng kanyang asawa.
Kasalukuyan pang iniimbestigahan ang sanhi ng sunog at kung magkano ang halaga ng natupok ng apoy.
