Isinugod sa Rural Health Center ng Santa Maria, Romblon ang isang nakainum na rider matapos na mag crash ang kanyang motorsiklo sa tambak ng rubbles na nasa gilid ng kalsada sa Barangay Concepcion Norte.
Ayon kay Police Senior Inspector Manuel Fernandez Jr. ng Santa Maria Municipal Police Station, bandang 10:20 ng gabi nitong Biyernes, December 08, binabaktas ng rider na si Ronald Doroy Mapalad, 43, ang kahabaan ng Tablas Circumferential Road ng maaksidente sa Barangay Concepcion Norte.
Hindi umano napansin ng rider na nasa dulo na pala siya ng nakasementong kalsada at dumire-diretso hanggang sa mawalan ng kontrol at mag crash sa tambak ng rubbles na nasa gilid ng kalsada.
Nagtamo ng sugat sa ulo, at sa paa si Mapalad kaya agad itong dinala sa Rural Health Center sa bayan.
Napag-alaman ng kapulisan na nakinum ng alak ang rider bago mangyari ang aksidente.
Samantala, dinala na muna sa Santa Maria Municipal Police Station ang sasakyan ng rider.
