Opisyal ng binuksan ngayong Martes, December 11, ang HIV/AIDS Treatment Hub o Red Shelter na matatagpuan sa Romblon Provincial Hospital (RPH) sa Odiongan, Romblon para makatulong sa mga pasyenteng gustong magpakunsolta patungkol sa human immunodeficiency virus (HIV) at acquired immune deficiency syndrome (AIDS).
Pinangunahan ang pagpapasinaya ni Romblon Governor Eduardo Firmalo, SP Felix Ylagan, at RPH Chief of Hospital Ben Anatalio at sinaksihan naman ng mga empleyado ng ospital.
Ang nasabing HIV/AIDS Treatment Hub ay nagawa sa pagtutulungan ng Department of Health (DOH) at ng Provincial Government ng Romblon.
Sinabi sa isang pahayag ni Governor Firmalo na ang serbisyo na gagawin sa Red Shelter ay libre katulad ng HIV Testing, konsultasyon, at treatment sa nasabing sakit.
Hunyo ngayong taon ng mag pre-launching ang nasabing proyekto sa RPH na pinangunahan ng Department of Health at ng Research Institute for Tropical Medicine (RITM).
Hinihikayat naman ng Department of Health ang lahat na mag HIV-test sa Red Shelter sa RPH o di kaya sa Social Hygiene Clinic sa Rural Health Unit ng Odiongan para masigurong ligtas at wala silang sakit na HIV o di kaya’y maagapan at hindi mauwi sa acquired immune deficiency syndrome (AIDS) na pwedeng ikamatay.
Pinaalala rin ng DOH na isa sa pinaka the best na paraan para maiwasan ang mga nabanggit na sakit ay ang pagsisiguro na tapat sa mga asawa at hindi na nakikipagtalik sa iba.
Matatagpuan ang HIV/AIDS Treatment Hub sa ground floor ng Romblon Provincial Hospital Building 2.
