Anim katao ang isinugod sa Romblon Provincial Hospital matapos masangkot sa salpukan ng dalawang motorsiklo ang kanilang sinasakyan nitong gabi ng Miyerkules, December 05.
Nangyari ang aksidente sa kahabaan ng Tablas Island Circumferential Road (TICR) sa bahagi ng Barangay Poctoy, Odiongan, Romblon.
Ayon kay Police Chief Inspector Peter Brian Fallurin, hepe ng Odiongan Municipal Police Station, bandang 6:15 ng gabi, binabaktas umano ng dalawang rider ang Tablas Island Circumferential Road sa magkasalungat na direksyon. Ang rider na si Alexander Coronel Dampil, 63, ay patungong Hilaga habang ang isang motor ay minamaneho naman ni Arnold Brin Ferreras, 41 at patungong Timog.
Bigla nalang umano nawalan ng kontrol ang dalawang sasakyang halos magkadikit na sa gitna kaya nagkasagian ang dalawa at nag-crash sa gitna ng kalsada.
Tumilapon si Dampil gayun rin ang mga pasahero nitong napag-alamang mga estudyante at pawang mga 15-taong gulang, mga residente ng Barangay Tuburan, Odiongan, Romblon. Samanta tumilapon rin si Ferreras, at ang kanyang sakay na si Mary Ann Mendoza, 38.
Agad na rinespondehan ng ambulansya ang anim para madala sila sa Romblon Provincial Hospital kung saan sila ngayon nagpapagamot.
Sinabi rin ng Odiongan Municipal Police Station na wala umanong suot na helmet ang mga backride ng dalawang sasakyan nang mangyari ang aksidente.
Dinala na muna sa Odiongan Municipal Police Station ang mga sasakyan ng dalawa habang patuloy na iniimbestigahan ang aksidente.
