Nakikiusap si Odiongan LGU officer-in-charge (OIC) Dr. Ramer Ramos sa lahat ng empleyado ng Gobyerno sa Odiongan, Romblon na sumunod sa ipinatutupad na ‘no helmet, no driving' policy sa bayan.
Sa panayam ng Romblon News Network kay Ramos nitong Lunes, November 05, sinabi nito na nakausap niya si Supt. Raquel Martinez, OIC ng Odiongan Municipal Police Station, at isinumbong sakanya na may mga empleyado ng munisipyo at ibang national agencies ang hindi parin tumatalima sa patakaran.
“Nakausap ko si hepe kanina, sabi niya sakin, may mga nakita silang mga empleyado nating hindi sumusunod sa batas,” ayon kay Ramos.
Sinabi ni Ramos na sinabihan niya na ang lahat ng department heads ng Local Government Unit ng Odiongan na magsuot ng helmet tuwing sasakay ng motorsiklo.
“Kailangan nilang sumunod kasi wala silang magagawa at national law yan. You have to be a good example to public. Government worker ka, dapat alam mo ang batas.” dagdag ni Ramos.
Matatandaang simula noong November 01 ay mahigpit ng ipinatutupad sa bayan ng Odiongan ang ‘no helmet, no driving' policy kung saan pwedeng pagmultahin ang mga mahuhuling hindi nagsusuot ng helmet ng P1,500 cash.
Hiniling rin ni Ramos na sana kahit gabi ay magsuot rin ng helmet ang publiko lalo na sa mga babiyahe palabas ng sentro ng Odiongan o di kaya'y malalayo ang uuwian para na rin umano ito sa kaligtasan ng lahat.
