Sugatan ang isang rider at ang angkas nito matapos na sumalpok sa isang metal barrier ang kanilang sinasakyang motorsiklo nitong gabi ng Sabado, September 29, sa Barangay Concepcion Norte, Santa Maria, Romblon.
Kinilala ni Police Senior Inspector Manuel Fernandez Jr., hepe ng Santa Maria Municipal Police Station, ang mga sakay ng motorsiklo na sina Albert Galdiano Biotos, 35; at Arnold Dithsi Emaas, 36, pawang mga residente ng Barangay San Isidro sa parehong bayan.
Ayon sa pulisya, binabaktas ng dalawa ang kahabaan ng Tablas Island Circumferential Road patungong town proper ngunit pagdating nila sa bahagi ng Concepcion Norte, bigla umanong nawalang ng kontrol si Biotos sa sasakyan at nasalpok nito ang metal barrier na nasa gilid ng kalsada.
Tumilapon sina Biotos at Emaas sa sasakyan at dahil sa lakas ng pagkakasalpok, nagtamo sila ng iba't ibang galos at sugat sa katawan at ulo. Agad namang isinugod ng mga rumespondeng police ng Santa Maria Municipal Police Station sa Rural Health Unit ng Santa Maria para gamutin.
Napag-alaman naman ng pulisya na nakainum ang driver ng sasakyan ito at walang lisensya mula sa Land Transportation Office para magmaneho ng motorsiklo.
