Dinaluhan ng iba’t ibang sektor na nais makibahagi sa mga paglilinaw ng karapatan ng mga mamimili at mga may-ari ng negosyo ang 2018 Provincial Consumer Congress ng Department of Trade and Industry (DTI)-Romblon na ginanap sa Haliwood Inn Hotel sa bayan ng Odiongan, Romblon.
Ang naturang pagtitipon ay bahagi ng pagdiriwang ng Consumer Welfare Month na alinsunod sa Presidential Proclamation 1098 kung saan ang tema ngayong taon ay “Making Digital Market Places Fairer.”
Layunin nito na mapaangat ang kamalayan ng publiko, magkaroon ng sapat na kaalaman, tamang pag-uugali at kasanayan ang mga consumer ukol sa moderno at responsableng konsyumerismo upang mabigyan ng proteksiyon ang mamimili.
Ang kongreso ay nilahukan ng 80 indibidwal mula sa hanay ng senior citizens, persons with disability, women’s group at micro-small and medium enterprises.
Tampok na usapin sa nasabing kongreso ang DTI-DA-DOE Joint Administrative Order 17-01 and 02 Granting Special Discounts to Senior Citizens and PWD, No Shortchanging Act of 2016, Gift Check Act of 2017, RA 7581 or the “Price Act”, TRAIN Law: Briefer and FAQs na tinalakay nina Carlina B. Josue, Senior Trade & Industry Development Specialist at Maricon R. Aguibiador, Trade & Industry Development Specialist.
Nagbigay rin ng updates si NFA Provincial Manager Romulo O. Aldueza hinggil sa kasalukuyang estado ng suplay ng bigas sa lalawigan gayundin si Dennis Evern Fabito, Fisheries Livelihood Development Technician ng BFAR ukol sa kalagayan ng suplay ng isda at iba pang produktong pangisdaan sa mga palengke.
Parehong tiniyak ng mga ito na sapat ang suplay ng bigas at isda sa buong lalawigan kung kaya walang dapat ipangamba ang mga consumer sa iba’t ibang bayan ng Romblon.
Isa-isa ring hinimay ng pamunuan ng DTI-Romblon ang nilalaman ng Philippine laws and Regulations on Product Standards (RA 4109) kung saan ipinaliwanag ang mga karapatan at responsibilidad ng mga mamimili at ipinaunawa kung ano ang mga produktong sakop lamang ng price control kapag may pagtaas sa presyo ng mga ito upang maiwasan ang hindi pagkakaunawaan sa pagitan ng mga mamimili at namumuhunan.(DMM/PIA-MIMAROPA/Romblon)
