Isang presong nakakulong sa Looc Municipal Police Station ang isinugod sa Don Modesto Formilleza Sr. Memorial Hospital matapos na makitang walang malay ng mga kapulisan nitong umaga ng Huwebes, September 06.
Ayon sa Romblon Police Provincial Office (Romblon PPO), bandang alas-11 ng umaga nitong Huwebes, sinubukan umanong tawagin ng isa sa mga pulis ang preso na kinilalang si Felizardo Pequet Ramos, 59-anyos, residente ng Pangasinan at hinuli dahil sa kasong frustrated murder, ngunit hindi umano ito sumagot kaya nagdesisyon itong buksan ang kulungan para silipan si Ramos.
Dito na tumambad sa pulis ang walang malay na si Ramos na noong panahong iyon ay duguan rin ang kamay matapos na maglaslas sa kamay gamit ang isang metal plate na ginagamit na stand ng Baygon Katol.
Matapos na tingnan ng doctor ng Don Modesto Formilleza Sr. Memorial Hospital, inirekomendang dalhin ng Romblon Provincial Hospital si Ramos para sa mas masusing pagpapagamot.
Nagpapagaling na ngayon si Ramos.
Patuloy namang iniimbestigahan ng Looc Municipal Police Station kung paano nakapasok sa loob ng kulungan ang nasabing metal plate.
