Sugatan ang isang limang taong gulang na bata sa Barangay Limon Norte, bayan ng Looc, Romblon matapos na mabundol ng motorsiklo nitong hapon ng Lunes, September 03.
Ayon sa report na nakarating sa opisina ni Senior Inspector Ledilyn Ambonan, spokeperson ng Romblon Police Provincial Office, bandang 3:45 ng hapon habang binabaktas ng isang pulang motorsiklo na minamaneho ni Rhonel Liwanan Gaa, 18-anyos, ang kahabaan ng National Road bigla umanong tumawid ang 5-anyos na bata.
Sinubukang iwasan ni Gaa ang bata ngunit hindi na ito nagawa dahil may kabilasan ang kanyang patakbo. Tumilapon ang bata habang ang rider naman ay sumimplang sa kalsada.
Agad na dinala ang bata sa Don Modesto Formilleza Sr. Memorial Hospital para bigyan ng paunang lunas habang si Gaa at ang kanyang motorsiklo naman ay dinala sa Looc Municipal Police Station para imbestigahan.
Napag-alamang walang dalang helmet ang rider at wala ring lisensya ng ito ay masangkot sa aksidente.
Ayon sa Looc Municipal Police Station, nagkasundo ang dalawang panig na mag-usap nalang sa Barangay Hall ng Limon Norte para ayusin ang kaso.
