Namatay sa ospital ang isang rider sa Odiongan, Romblon matapos masalpok ng isang truck nitong hapon ng Lunes, August 06.
Kinilala ang rider na si Benjie Perez Familara, 39-anyos, residente ng Barangay Rizal; habang ang driver naman ng truck ay kinilalang si Freeman Asis Fajanilan Jr., 38-anyos, residente naman ng Barangay Tubigon, Ferrol, Romblon.
Ayon kay Fajanilan habang paakyat siya sa approach ng tulay sa Barangay Dapawan bigla umanong nahulog ang isang gulong ng minamaneho niyang truck sa gutter ngunit habang binabawi niya ang gulong pabalik sa kalsada hindi niya na kontrol ang truck at nalipat sa kabilang linya kung saan sakto namang nandun ang kasalubong niyang rider na si Familara kaya ito nasalpok.
Tumilapon si Familara at nagkayupi-yupi ang unahang bahagi ng kanyang motorsiklo habang ang truck naman ay nahulog sa gilid ng approach ng tulay at tumagilid.
Isinugod pa sa Romblon Provincial Hospital ang rider ngunit nasawi na rin kalaunan dahil sa natamong mga sugat sa ulo at sa katawan.
Ayon sa isang residente, bigla nalang umano silang nakarinig ng malakas na lagapuk at doon na nila nakitang nakatagilid na ang truck malapit sa kanilang bahay.
Maswerte namang hindi nadamay ang mga bahay na nasa gilid ng tulay.
Nakakulong na ngayon si Fajanilan sa Odiongan Municipal Police Station at nahaharap sa kaukulang kaso.
