Naglunsad ng ‘Oplan Kalusugan’ ang pamunuan ng Department of Education (DepEd) – Division ng Romblon upang masiguro na maayos ang kalagayan ng mga estudyante sa lalawigan hindi lamang pisikal kundi ang kanilang kaisipan.
Sinabi ni Schools Division Superintendent Roger Capa, layunin ng programa na matiyak na mabibigyan ng pangunahing kalusugan at pangangalaga sa ngipin ang mga mag-aaral upang mailabas ang kanilang potensiyal sa pag-aaral.
Sakop ng Oplan Kalusugan ang school-based feeding program; national drug education program; adolescent reproductive health education; water, sanitation,at hygiene in schools program; maging ang mga serbisyong medikal.
Kaugnay ito, naglunsad rin ng ‘One Health Week’ sa lalawigan, kung saan nagkasa ng oryentasyon ang ang DepEd Division Office para sa mga magulang.
Tampok dito ang naaangkop na edad sa kalusugan at kasanayan sa kalinisan; inspeksiyon ng mga silid-aralan, nagsagawa ng malawakang paglilinis gayundin ang pagkakaroon ng gulayan sa paaralan, mental health, and tobacco control at ang pagtitinda ng mga masusustansyang pagkain sa kantina.
Ayon kay Capa, titiyakin ng kanilang opisina ang pagkakaroon ng malusog na kaugalian sa lahat ng kanilang mga tauhan at mga estudyante.
Makakatuwang rin ng DepEd sa programang ito ang Department of Health (DOH), Rural Health Units ng lokal na pamahalaan upang maghatid ng serbisyong pangkalusugan sa mga mag-aaral.
Magiging madali na aniya sa mga bata ang tumutok sa kanilang pag-aaral kapag walang iniindang karamdaman at kapag malakas ang pangangatawan ng mga ito. (DMM/PIA-MIMAROPA/Romblon)
