Patay ang isang ginang sa Barangay San Isidro, bayan ng Alcantara sa Tablas Island matapos masalpok ng isang motorsiklo nitong umaga ng Sabado, August 25.
Kinilala ang nasawing ginang na si Jema Fortuno Galin, 52-anyos, residente ng nasabing barangay habang ang rider naman ay kinilalang si Romeo Galang Villanueva, 44-anyos, residente naman ng Barangay Camili sa parehong bayan.
Batay sa report na nakarating sa opisina ni Senior Inspector Ledilyn Ambonan, spokeperson ng Romblon Police Provincial Office, bandang alas-10 ng umaga, habang naglalakad sa gilid ng kalsada si Galin galing sa isang meeting ng Pantawid Pamilyang Pilipino Program (4Ps) nang bigla itong masalpok ng motorsiklo ni Villanueva.
Sa lakas ng pagkakasalpok sa biktima, tumilapon ito at nabagok ang ulo na dahilan ng kanyang ikinamatay.
Sinubukan pang isugod sa Don Modesto Formilleza Sr. Memorial Hospital sa bayan ng Looc si Galin ngunit idineklara itong dead on arrival.
Nakakulong na ngayon ang rider at nahaharap sa kasong homicide.
