Isang bangkay ng lalaki ang narekober ng mga tauhan ng Bureau of Fire Protection, Odiongan Municipal Police Station at Municipal Disaster Risk Reduction and Management Office sa ilog na bahagi ng Firmalo Boulevard sa Barangay Liwanag, Odiongan, Romblon.
Ayon sa Bureau of Fire Protection, nakatanggap sila ng report na di umanoy may lalaking tumalon sa ilog bandang alas-10:45 ng umaga kanina. Agad naman silang nagsagawa ng rescue operation ngunit patay na ng marekober nila ang nasabing lalaki.
Kinilala ang lalaki na si Dante Agustin, 43-year old, isang ice cream vendor at residente ng Barangay Budiong.
Sinubukan pang dalhin sa Romblon Provincial Hospital ang lalaki ngunit idineklara itong dead on arrival.
Kwento naman ng asawa nito, ilang araw na umanong wala sa matinong pag-iisip ang si Dante bago umano ito magpatiwakal ngayong araw.
“Nung isang araw kasi sinasabi niya sa amin na magtago daw kami at may lalaking pupunta sa bahay at babarilin kami. Parang sinasapian kasi siya at kung ano-anong sinasabi sa amin,” pahayag ng asawa.
“Kaninang umaga, umakyat sa niyog para kumuha ng ‘tuba’ kahit malakas ang ulan kaya nadulas siya at nahulog. Dinala yan dito sa ospital para gamutin pero ayaw niya magpagamot,” kwento ng asawa.
“Nung pauwi na siya, bigla siyang pumunta dun sa ilog at tumalon. Magpapakamatay talaga ata siya,” dagdag ng asawa.
