Patay ang isang magsasaka sa bayan ng Looc, Romblon matapos itong pagtatagain ng kanyang nakaalitan nitong umaga ng Sabado, June 23.
Kinilala ni Police Senior Inspector Jedi Galicha ang nasawi na si Novelino Fabon Gan, 45 anyos at residente ng Barangay Pili.
Batay sa imbestigasyon ng pulisya, bago pagtatagain si Gan ng suspek na si Raffy Mercano Ibabao, 37 anyos, ay nakaalitan niya muna ito dahil sa isang bagay. Habang nagtatalo ang dalawa ay bigla umanong bumunot ng bolo si Ibabao at pinagtataga si Gan.
Hindi na nakatkbo si Gan dahil masakit umano ang tuhod nito dahil sa rayuma.
Agad namang dinala si Gan sa Don Modesto Formilleza Sr. Memorial Hospital at kalaunan ay inilipat sa Romblon Provincial Hospital ngunit nasawi rin dahil sa dami ng natamo niyang taga mula sa suspek.
Samantala, naaresto ng mga tauhan ng Looc Municipal Police Station ang suspek matapos ang follow-up operation sa Barangay Pili.
Nakakulong na ito at maaring maharap sa kaukulang kaso.
