Pinangunahan ngayong araw, June 12, ni Atty. Lorenzo ‘Larry' Gadon ang paggunita ng Araw ng Kalayaan sa bayan ng San Andres sa Tablas Island, Romblon.
Kasama ni Atty. Gadon na nag-ikot sa Poblacion ang mga kawani at opisyal ng Local Government Unit ng San Andres sa pangunguna ni Mayor Arsenio Gadon, mga empleyado ng gobyerno sa San Andres at mga Non-Government Offices.
Nag-alay rin sila ng mga bulaklak sa bantayog ni Gat. Jose P. Rizal sa Poblacion.
Sa mensahe ni Atty. Gadon sa harap ng mga government employees ng San Andres na dumalo sa nasabing pagdiriwang, pinaalaala nito ang kahalagahan ng pagiging malaya ng bansang Pilipinas mula sa mga mananakop.
Gadon Announces Senate Bid
Handa na rin umanong tumakbo muli si Atty. Larry Gadon sa pagka-Senador sa susunod na halalan.
Kinumpirma ng dalawang source ng Romblon News Network, na sinabi ni Atty. Gadon sa bahagi ng kanyang talumpati sa pagdiriwang Araw ng Kalayaan sa bayan ng San Andres na siya ay tatakbo sa pagka-Senador sa 2019 midterm election.
Matagal na ring hinihikayat si Gadon ng kanyang mga taga-suporta na muling tumakbo matapos itong matalo noong 2016.
Si Atty. Larry Gadon ay nakilala matapos nitong pangunahan ang paghain ng impeachment complaint laban sa dating Chief Justice Maria Lourdes Sereno dahil umano sa hindi pagiging totoo ng huli sa kanyang Statement of Assets, Liabilities, and Net Worth (SALN).
