Pumanaw na ngayong gabi si Zian Casphere Salazar, ang 2-taong gulang na bata na na hit-and-run ng isang motorsiklo nitong gabi ng Huwebes, May 10, sa Tablas Island Circumferential Road sa bahagi ng Barangay Matutuna, bayan ng San Andres, Romblon.
Bandang 8:44 ngayong gabi ng pumanaw si Zian sa loob ng Romblon Provincial Hospital matapos magtamo ng iba’t ibang bali sa katawan sanhi ng pagkakabundol sa kanya ng motorsiklo.
Ayon sa nakuhang report ng Romblon News Network, ang nasabing menor de edad ay nasa labas ng kanilang bahay ng masalpok ng humaharurot na motor kagabi.
Hindi umano huminto ang rider matapos itong makasalpok ng bata kundi ay mas binalisan pa umano ang pagpapatakbo.
Ipinagbigay alam na rin ng pamilya ni Zian sa San Andres Municipal Police Station ang nangyari para makatulong para matukoy ang rider.
