Pinagtataga ng isang magsasaka ang kanyang sariling kuya sa Santa Maria, Romblon nitong gabi ng Sabado.
Kinilala ang biktima ni Santa Maria Municipal Police Station Chief, Police Senior Inspector Sandy Falcutila, na si Jordy Cezar Paulino, 32-taong gulang; habang ang suspek naman ay kinilalang si Jomar Cezar Paulino, 29-taong gulang, pawang residente ng Sitio Malatagum, Brgy. Sto Nino.
Batay sa inisyal na imbestigasyon ng pulisya, nagsimula ang pananaga matapos na komprontahin ng biktima ang suspek kung bakit nito sinaktan ang 16-anyos niyang anak.
Imbes umanong humingi ng patawad at paumanhin ang suspek ay nakipagsagutan pa ito nagtanim ng galit laban sa kuya.
Ilang minuto ang lumipas, pumasok umano ng bahay ng biktima ang suspek dala ang itak at nagsisigaw na “Salaga ang akon mga labo! Patyon tikaw!”, sabay hataw ng bolo sa biktima.
Agad namang naawat ng mga kamag-anak si Jomar. Samantala, isinugod sa Romblon Provincial Hospital ang biktimang si Jordy.
Ayon sa pulisya, agad umanong tumakas ang suspek na si Jomar Cezar Paulino matapos ang krimen ngunit naiwan nito ang bolo na ginamit niya sa pananaga sa kanyang sariling kuya.
Patuloy na pinaghahanap ng pulisya ang suspek.
