Namigay ng mga gamit pang-eskuwela sa mga batang maga-aaral ng isla ng Sibuyan at Banton, Romblon ang GMA Kapuso Foundation.
Ang naturang proyekto ay bahagi ng ‘Unang Hakbang sa Kinabukasan’ ng nabanggit na foundation upang matulungan ang mga mahihirap na estudyante sa elementarya.
Kabuuang 3,500 bags na naglalaman ng school supplies ang dala galing Maynila ng mga kinatawan ng GMA Kapuso Foundation upang ipamahagi sa kanilang napiling paaralan sa isla ng Sibuyan at bayan ng Calatrava.
Ayon kay Officer-in-Charge Schools Division Superintendent Roger F. Capa, ang inisyatibong ito ng foundation ay malaking tulong sa mga magulang dahil hindi na nila iisipin pa ang pagbili ng mga school supplies para sa mga bata.
“Ang ating matiyagang pakikipag-ugnayan sa Central at Regional Office ng DepEd at maging sa iba't-ibang sektor o organisasyon ay nagkaroon na ng bunga at katuparan. Siguradong makikinabang nito ang ating mga mahihirap na mag-aaral sa malalayong paaralan sa probinsiya ng Romblon. Lahat ng pagsisikap ay ating ginagawa bilang tugon sa pangangailangan at pagpapakita ng malasakit sa kalagayan ng ating mga mahihirap na mag-aaral,” pahayag ni Capa.
“Ang makitang masaya ang ating mga mag-aaral ay sapat nang dahilan upang lalo naming gampanan nang maayos, sa abot ng aming kakayahan, ang mga tungkuling iniatang sa aming balikat. Ang kanilang mga ngiti ay sapat nang inspirasyon upang lalo pa naming pag-ibayuhin, sa kabila ng pagod at puyat, ang aming mga pagpupunyagi. Maraming salamat sa GMA Kapuso Foundation na naging instrumento at daluyan ng pag-asa para sa magandang kinabukasan ng ating mga mag-aaral sa mga isla ng Sibuyan at Banton,” pagtatapos ni Capa. (CLJD/DMM-PIA MIMAROPA)
