Isang anim na taong gulang na batang lalaki ang sugatan matapos na ma hit-and-run ng isang van Barangay Concepcion Sur, Sta Maria, Romblon kahapon ng hapon.
Ayon sa ina ng bata na si Marivic Mindo na dumulog sa Santa Maria Municipal Police Station, na salpok umano ng isang van ang kanyang anak ngunit hindi umano tumigil ang sasakyan at dumiretso patungong San Agustin.
Naplakahan umano ni Mindo ang van at ito ay napag-alamang minamaneho ni Edgar Mangaya, residente ng Barangay Doña Juana sa bayan ng San Agustin.
Agad na nagsagawa ng operasyon ang mga tauhan ng San Agustin at Santa Maria Municipal Police Station para hanapin ang van at ang driver nito hanggang sa makita nila si Mangaya. Dinala si Manggaya at ang minaneho niyang van sa Santa Maria Municipal Police Station para imbestigahan.
Nagpapagaling na ngayon ang batang lalaki sa Don Modesto Formilleza Sr. Memorial Hospital sa bayan ng Looc matapos itong magtamo ng iba't ibang sugat sa katawan.
