Malinis at walang makitang mga karne ng baboy na ibinebenta sa mga lamesa sa Wet Section ng Odiongan Public Market ngayong araw matapos na mag ‘welga’ diumano ang mga vendors at mga kumakatay ng karneng baboy at manok sa nasabing bayan.
Ayon sa may-ari ng ilang pwesto sa palengke, may inikot diumanong papel nitong nakaraang araw na pinirmahan ng mga meat vendors na nagsasabing magkakaroon ng holiday sa pagkatay ng mga baboy at manok ngayong araw.
Nag-ugat umano ang ‘welga’ ng mga meat vendors sa pagpapalipat ng katayan ng baboy mula sa lumang slaughterhouse sa Barangay Tabin-Dagat patungo sa bagong slaughterhouse sa Barangay Anahao.
Ayon sa mga meat vendors, kulang umano ang tubig sa bagong slaughterhouse at pangit rin umano ang kalsada patungo roon.
Apektado ang mga mamimili
Ilang mga mamimili tuloy ang nahirapang mamili ng ulam kaninang umaga dahil sa kawalan ng mga bentang manok at karne.
Ayon sa ilang nakausap ng Romblon News Network na mamimili, gulay nalang umano muna ang kanilang iuulam ngayong araw dahil market day naman umano at may mga sariwang gulay galing sa iba’t ibang barangay.
Sangguniang Bayan ng Odiongan, desidido na ipasara ang lumang slaughterhouse
Desidido naman ang pamunuang bayan ng Odiongan na ilipat ang operasyon sa bagong slaughterhouse sa Barangay Anahao dahil marami na umanong violations ang natatangap ng lumang slaughterhouse mula sa iba’t ibang ahensya ng gobyerno katulad ng National Meat Inspection Service (NMIS) ng Department of Agriculture (DA) at ng Department of Environment and Natural Resources (DENR).
Sinabi ni Vice Mayor Mark Anthony Reyes sa regular session ng Sangguniang Bayan ng Odiongan ngayong araw na matagal na dapat inilipat ang operation ng slaughterhouse ngunit nagka-problema umano sa NMIS kaya na-pending ito.
Nakapagpasa rin ngayong araw ang Sangguniang Bayan ng Odiongan ng ordinansa na nagbibigay ng kapangyarihan sa Local Chief Executive ng Odiongan na ipasara na ang lumang slaughterhouse at buksan ang operation sa bagong slaughterhouse sa Barangay Anahao.
Nakatakda namang magharap ngayong araw sa isang pagpupulong ang mga meat vendors at mga myembro ng Sangguniang Bayan ng Odiongan para pakinggan ang kanilang hinaing kaugnay sa nasabing problema.
