Hinikayat ni National Police Commission (NAPOLCOM) Commissioner Zenonida F. Brosas ang mga alkalde at mga chief of police sa lalawigan ng Romblon na magtulungan para mabigyan ng mas maganda at maraming serbisyo pa ang mga mamayan na kanilang nasasakupan.
Sinabi ito ni Commissioner Brosas sa ginanap na orientation para sa mga alkalde at kapulisan patungkol sa Community and Service-Oriented Policing (CSOP) System ng NAPOLCOM.
Ayon kay Brosas, ang pakikipagtulungan ng mga mamayan, local chief executive at kapulisan ay makakatulong sa pag-improve ng Police Service Delivery, at iba pa.
Sinabi pa ni NAPOLCOM Acting Regional Director for MIMAROPA, Atty. Owen De Luna, ang CSOP System ng NAPOLCOM ay upgrade lamang ng COPS – Problem-Oriented Policing at Traditional Policing.
Makakatulong rin umano ang CSOP pagdating sa mga problema sa pamayanan. Halimbawa umano nito ay ang problema na minsan ay marinig ng mga pulis, pwede na nila ito iparating sa mga alkalde para masolusyunan.
“Halimba, may nadapa sa kalsadang ito at may nagreklamo sa mga pulis, magtatanong yung pulis, bakit kaya anong problema dito bakit laging may nadadapapa? Dito na malalaman ng pulis na, ‘ah baka may problema itong kalsada, may problema yung kontraktor', sasabihin ngayon ng pulis kay Mayor na ‘Mayor, yung kalsada po natin baka pwede patingnan kasi laging may dadapa, may problema ata ang kontraktor',” paliwanag ni Atty. De Luna.
Ang nasabing CSOP System rin ayon sa NAPOLCOM ay magiging crime prevention strategy ng mga law enforcers sa bansa.
