Dalawampu’t limang magsasaka na nagtatanim ng gulay sa bayan ng Odiongan ang nagsipagtapos sa Farmers Field School na itinaguyod ng Department of Agriculture (DA) – Agricultural Training Institute (ATI) – Mimaropa.
Ang mga nagsipagtapos na magsasaka ay mula sa Bgy. Gabawan at Bgy. Rizal na inorganisa ng Office of the Municipal Agriculturist (OMAg) upang maitaguyod ang pag-aaral at makatapos ang mga kasapi ng matiwasay.
Ang pag-aaral na pinamagatang Farmers Field School Training on Organic Vegetable Production ay pinangasiwaaan ng LGU Odiongan sa tulong ng mga tauhan ng Pambayang Agrikultura ng Bayan.
Ang nasabing programa ay bahagi ng adhikain ng DA–ATI Mimaropa na maituro ang kahalagaan ng pagtatanim ng gulay sa organikong paraan, maisulong ang kampanya ng mga ahensiya na nakatuon sa pagtaas ng produksyon at bumalik sa dating (basic) paraan ng pag-aalaga ng native na baboy at manok, ang pagsasaka na hindi gumagamit ng kemikal na nakakasira sa kalusugan at kapaligiran.
Ayon sa Media Production Specialist ng ATI-Mimaropa, nakahanda ang kanilang tanggapan na tumulong upang maitaguyod ang napag-aralan ng mga magsasaka kung maisasabuhay nila ang kanilang natutunan para pamarisan ng iba.
Hiling ng pamunuan ng ATI-Mimaropa sa mga nagsipagtapos ang tuloy-tuloy at pagpapalaganap ng mga natutunan sa 16 -linggong hands-on training sa paraan ng pagatatanim, paggawa ng mga organikong pestisidyo at mga pataba na kung saan ang mga produktong ginamitan nito ay mas mabilis na mabili sa merkado partikular sa Pamilihang Bayan ng Odiongan.
