Pinaboran ng mga mamimili ng isda sa Odiongan Public Market ang price ceiling sa mga marine products na sinimulang ipatupad ngayong unang araw ng Marso.
Ayon kay Edmond Malacad, isa sa mga mamimili na nakausap ng Romblon News Network, pabor umano sa mga mahihirap na katulad nila ang presyo ng isda dahil malaking tulong umano ito sa mga hirap sa buhay.
“Okey na yan, at least hindi masyadong mahal ang presyo,” pahayag ni Malacad.
Ilan pang mamimili na nakausap ng Romblon News Network ang nasiyahan sa mababang presyo ng isda sa merkado.
Pabor rin ang mga tindiro ng isda sa palengke sa price ceiling na ipinatutupad ng Local Government ng Odiongan, ayon sa isa sa mga vendor na nakausap ng Romblon News Network, hindi na rin umano sila lugi dahil pumapatong naman umano sila ng P10-P20 kada kilo ng isda.
“Nagmamahal lang talaga yan kapag nalilipat lipat, mas maganda nga diretso nalang sa merkado ang isda galing dagat para mas mababa pa,” pahayag ng isa sa mga vendor na tumangging magpakilala.
Sa Ordinance No. 2018-01 na sinulat ni SB Rolly Lachica, sinabi rito na ang presyo ng mga isda ay ibabase kung anong klaseng isda ito at kung ito ay pasok ba sa Special Class, First Class, Second Class, Third Class, at Fourth Class.
Ayon sa ordinansa, ang lahat ng fish vendor na lalabag sa nasabing ordinansa ay pwedeng mapatawan ng P1,000 hanggang P2,500 na multa o di kaya ay pagka-kansela ng kanilang business permit.
