Pinatigil ng mga tauhan ng San Agustin Municipal Police Station ang nagaganap na sayawan sa Plaza ng Barangay Carmen nitong Biyernes bilang bahagi ng pagdiriwang sana ng kanilang barangay fiesta.
Ayon sa mga residente ng barangay, pumasok umano bigla ang mga pulis sa plaza at inanunsyong ititigil na ang sayawan.
Sinabi ni Police Senior Inspector Clarms Mutia ng San Agustin Municipal Police Station na hanggang alas-12 lamang ng hating gabi ang permit na ibinigay ng munisipyo ng San Agustin sa Barangay Carmen para idaos ang nasabing sayawan.
Pagdating ng Sabado, araw mismo ng fiesta, nagpadala umano ng sulat ang mga residetente ng Barangay Carmen sa alkalde ng San Agustin na si Mayor Denon Madrona para humiling na i-extend ng dalawang oras ang event para sa Sabado ng gabi ngunit hindi umano sila pinagbigyan.
“Nagpadala sila ng sulat kay Mayor para mag-extend pero hindi naman sila pinayagan kaya kailangan naming ipatupad ang batas para hindi sila makasuhan ng public disturbance,” pahayag ni Police Senior Inspector Mutia ng makausap ng Romblon News Network.
Ayon sa mga residente ng Barangay Carmen, ang kanilang pinadalang sulat ay may kasamang pirma ng mga residente ng Barangay bilang patunay na nagkakaisa sila sa nasabing extention.
Samantala, pinaiimbestigahan na umano ng alkalde sa pulisya ang ulat na di umanoy nag-extend parin ang sayawan hanggang alas-3 ng umaga nitong Sabado kahit pinigilan na sila ng pulisya at walang extention permit galing sa munisipyo.
“Sinabi kasi sa akin ni kap na siya na ang bahala, akala ko paalisin niya na yung mga tao, narinig nalang namin na na-extend pala hanggang alas-3 yung sayawan,” pahayag pa ni Police Senior Inspector Mutia.
Hinaing naman ng mga residente ng Carmen, nagkakaisa umano sila sa pag-extend nito at wala naman umanong magrereklamo sa kanila ng public disturbance kung sakaling hanggang alas-3 ang sayawan dahil maiintindihan umano nila ito.
