Arestado ang isang lalaki matapos na di umanoy pagtangkaang barilin nitong hapon ng Huwebes ang kanyang nakababatang kapatid sa Barangay Taclobo, San Fernando, Romblon.
Sa report na nakarating sa opisina ni Police Senior Inspector Leidelyn Ambonan, spokeperson ng Romblon Provincial Police Office, bandang 4:30 umano ng hapon ng puntahan ng suspek na si Armando Rodelas, 65, ang kanyang nakababatang kapatid na si Dionito Rodelas, 55, sa isang palayan sa nasabing barangay.
May dala umano ang suspek na isang improvised homemade shotgun at hinamon ng barilan ang biktima.
Habang naglalagay ng bala ang suspek sa kanyang shotgun ay biglang tumakbo palayo ang biktima, dito na umano siya binaril ngunit hindi umano siya tinamaan. Nag-reload ng bala ang suspek ngunit sa ikalawang subok nito ay pumalyang pumutok ang baril dito na nakatakbo ng mabilis at nakahingi ng tulong sa isang barangay tanod ang biktima.
Nagsumbong ang biktima at ang tanod sa pulisya at agad na pinuntahan ng San Fernando Municipal Police Station ang suspek at dito na siya naaresto. Narekober rin ng pulisya ang improvised shotgun na ginamit ng suspek sa di umanoy pamamaril.
Dinala na sa Romblon, Romblon ang suspek para i-inquest sa kasong Attempted Murder.
Ayon kay SPO2 Marlou Rosas, Chief Investigator ng San Fernando Municipal Police Station, matagal na umanong may-alitan ang dalawa at maari ito dahilan kung bakit namaril ang suspek.
