Isang kotse na nawalan ng kontrol ang sumalpok sa isang poste ng kuryente sa Barangay Balogo bayan ng Calatrava, Romblon nitong tanghali ng November 30.
Kinilala ang driver ng sasakyan na si Konsehal Norman Manal Fatalla, 48, Sangguniang Bayan member ng San Agustin, Romblon.
Batay sa police report ng Calatrava Municipal Police Station, patungong bayan ng Odiongan ang kotse galing bayan ng San Agustin nang maaksidente.
Pumutok umano ang dalawang gulong ng sasakyan ni Fatalla kaya siya nawalan ng kontrol rito hanggang sa sumalpok sa poste ng Tablas Island Electric Cooperative, Inc. (TIELCO) na nasa gilid lang ng kalsada.
Agad namang tinulungan ng mga nakasaksi si Fatalla at ang kanyang asawa na nakasakay rin sa kotse.
Wala namang natamong galos o sugat ang mag-asawa.
Patuloy na iniiimbestigahan ng Calatrava Municipal Police Station ang nasabing aksidente.
