Dinagsa ng mga taga-suporta ni Pangulong Rodrigo Duterte ang isinagawang pagtitipon ng People’s Congress sa bayan ng Odiongan sa Tablas Island, Romblon ngayong araw ng Sabado.
Umabot sa mahigit 1,000 katao ang dumalo sa nasabing pagtitipon kung saan galing pang iba’t ibang bayan sa lalawigan.
Nagkaroon sila ng parada paikot sa bayan ng Odiongan, Romblon at maikling programa sa Odiongan National High School kung saan pinag-usapan kung ano ang People’s Congress at ilang topiko katulad ng Yaman ng Pilipinas at ang P10,000,000 budget umano na ibibigay sa bawa’t barangay kada buwan.
Sa talumpati ni Mr. Roberto Fortu, Provincial Coordinator ng People’s Congress sa Romblon, sinabi nito na naniniwala sila sa mga programa ni Pangulong Rodrigo Duterte at handa nila itong suportahan.
Bahagya namang nagka-tensyon sa pagtitipon matapos na magtanong ang isa sa mga dumalo na galing pa sa bayan ng Magdiwang.
Aniya, kelan ba umano sila uupo bilang Barangay Official at kung anong mangyayari kung hindi naman naging Federalismo ang Gobyerno, paano nalang umano ang mga pumunta sa pagtitipon at umasang ma-aapoint sila.
Sagot sa kanya ng Provincial Coordinator ng People’s Congress: Ang Federalism kasi ito ay programa para sa atin dito sa baba. I devolve dito sa baba yung power, hindi monopolize power. Magdidisisyon tayo para sa ating sarili. Siguro si Sir, naka focus sa take-over. Alam ninyo kung bakit hindi ko yan tinalakay? Kasi lalabas yan na pumunta kayo rito na ang after niyo lang ay doon sa P50,000 o sa P10,000,000. Hayaan niyo kung ano ang desisyon ng Pangulo, huwag niyong pangunahan.
Sagot naman ng nagtanong: Gusto ko lang ipasayod sa ating mga kasimanwa na ako mismo ay hindi nag-aafter sa sahod ko, ang gusto ko Serbisyo. Binanggit ng ating speaker na baka ang habol ko lang ay P50,000, nakakahiya yun, napahiya ako eh. Bakit hindi natin tumbukin yung pinunta natin dito. Ang akala ko, magkakaroon tayo ng kaisipan doon sa sinusulong ni Pangulong Duterte na Revolutionary Government.
Provincial Coordinator Roberto Fortu: Ganito po yan, yung pag meeting natin dito na pagsuporta sa Pangulong Duterte ay dahil nga yung pinoprogramang Federalismo. Sa ngayon wala pa tayong draft. Ang kanyang brief draft ay magkakaroon tayo ng ating sariling desisyon. Ngayon, alam naman natin na hinahangad niyo na makaupo, kaya nga, mag-antay kayo.
Sumigaw ang nagtanong kung kelan umano ito, at sagot ni Fortu: Hindi ba kayo nag-aantay ng Balita? Sa Bulacan, nakatanggap na sila na hanggang Lunes nalang ang last day nang pag-impake ng mga nakaupo.
Ang sinasagaw naman ng nagtanong ay pumunta umano sila sa programa galing pa sa malayong lugar, at gumastos sila at nagpagod.
Sa huli, nagkasundo naman ang dalawa ngunit pinatanggal ang pangalan ng nagtanong sa listahan ng People’s Congress dahil sa nag-aapura umano ito sa posisyon.
Samantala, ilan sa mga dumalo ang nagbayad ng P200 bilang registration umano sa People’s Congress at nagkaroon rin ng covenant signing sa lugar gamit ang kani-kanilang mga dugo bilang pang thumbmark sa pinirmahang papel.
Patuloy namang kinukunan ng Romblon News Network ng pahayag ang Department of Interior and Local Government Romblon kaugnay sa sinabi ng grupong People’s Congress na sa Lunes ang huling araw na ng mga nakaupong barangay officials.
